İspaniyada üçgünlük matəm elan edildi

İspaniyanın Əndəlusiya muxtar icmasının hakimiyyəti Almeriya vilayətinin Los-Qalyardos qəsəbəsi yaxınlığında baş vermiş dağıdıcı meşə yanğınında həyatını itirənlərin xatirəsinə üçgünlük matəm elan edib.
AvroMedia.Az  xəbər verir ki, bu barədə region rəhbəri Xuanma Moreno məlumat verib.

Məlumata görə, yanğın nəticəsində azı 12 nəfər həlak olub, daha 23 nəfər isə itkin düşüb.

Axtarış-xilasetmə əməliyyatları davam edir və ölənlərin sayının arta biləcəyi istisna edilmir.

Hökumətin fövqəladə hallar üzrə rəhbəri Antonio Sans bildirib ki, həlak olanların əksəriyyəti əcnəbi vətəndaşlardır. Onların bir qismi təhlükəsiz sığınacaqda qalmaq barədə xəbərdarlıqlara əməl etməyərək avtomobillərlə ərazini tərk etməyə çalışıb.

Dörd nəfər avtomobildə yanaraq ölüb, digər səkkiz nəfərin isə avtomobillərini tərk etdikdən sonra alovun içində qaldığı bildirilir. Şəxsiyyətlərin müəyyənləşdirilməsi üçün DNT ekspertizası aparılır.

İspaniyanın Baş naziri Pedro Sançes isə faciə ilə bağlı həlak olanların ailələrinə başsağlığı verib və xilasedicilərə təşəkkürünü bildirib.