Özbəkistanın iki kəndi Qırğızıstana verildi

Özbəkistanla dövlət sərhədinin demarkasiyası çərçivəsində Batken bölgəsindəki iki kənd Qırğızıstana verilib.
AvroMedia.Az  xəbər verir ki, söhbət əvvəllər Fərqanə bölgəsinin bir hissəsi olan Çonqara və Taş-Tobo kəndlərindən gedir. Burada təxminən 2500 nəfər yaşayır. İndi onlar Batken bölgəsinə birləşdirilib.

"Bu kəndlərdə qırğızlar yaşayır. Orada əhalinin qeydiyyatı aparılacaq və bundan sonra yerli sakinlər Qırğızıstan vətəndaşlığını alacaqlar. Bu ərazilərin müqabilində Qırğızıstan tərəfi sərhəd zonasında Özbəkistan Respublikasına bərabər ölçülü torpaq sahələri verib", - deyə Qırğızıstan prezidentinin mətbuat katibi Askat Alagözov yazıb.

O, həmçinin, bildirib ki, Sai kəndindən Tayan kəndinə yol çəkmək üçün ümumi sahəsi 236 hektar olan bərabər ölçülü torpaq sahələrinin mübadiləsi aparılıb. Batken bölgəsinin sakinləri indi Aydarkendən Batken şəhərinə Sai və Tayan kəndləri vasitəsilə gedəcəklər - bu məsafə hazırda dolama yolu ilə 225 kilometrdirsə, təxminən 55 kilometr olacaq.