Dövlət Komitəsinin sədri Qobustandakı dini ibadət yerlərinin fəaliyyəti ilə tanış olub

Dini Qurumlarla İş üzrə Dövlət Komitəsinin sədri Ramin Məmmədov Qobustan şəhərində yerləşən Cümə və Heydər məscidlərini, həmçinin Diri Baba türbəsini ziyarət edib.

Bildirilib ki, dini ibadət yerlərində yaradılmış şəraitlə tanış olan Ramin Məmmədov din xadimləri ilə görüşlər zamanı ölkədə dövlət-din münasibətlərinin sağlam əsaslar üzərində qurulduğunu, milli-mənəvi dəyərlərin qorunması, tolerantlıq və qarşılıqlı hörmət mühitinin möhkəmləndirilməsinin cəmiyyətin sabit inkişafında mühüm rol oynadığını qeyd edib.
O, dini müxtəlifliyin düzgün təbliğinin cəmiyyətdə ayrı-seçkilik və qarşıdurma yaratmaq cəhdlərinin qarşısının alınmasında vacib amil olduğunu deyərək maarifləndirici layihələr, o cümlədən dini qurumlarla əməkdaşlığın gücləndirilməsinin zəruriliyinə toxunub.
Dövlət Komitəsinin sədri vurğulayıb ki, din xadimləri insanların mənəvi tərbiyəsində və milli-mənəvi dəyərlərin aşılanmasında xüsusi məsuliyyət daşıyırlar. İbadət evlərinə müntəzəm səfərlərin əsas məqsədi onların fəaliyyəti ilə yerində tanış olmaq, həmçinin qarşıda duran prioritetlər barədə fikir mübadiləsi aparmaqdır.
Din xadimləri Azərbaycan dövlətinin tolerantlıq və multikulturalizm siyasətinin cəmiyyətin bütün təbəqələri, o cümlədən dini icmalar tərəfindən dəstəkləndiyini, dini-mənəvi dəyərlərin qorunması və inkişafı məqsədilə həyata keçirilən tədbirlərdə bundan sonra da fəal iştirak etməyə hazır olduqlarını diqqətə çatdırıblar.скачать dle 12.1