202 minə ev alıb, liftdən istifadə edə bilmir

“Malibo” MTK binasında yaşayan vətəndaşa liftdən istifadə etməyə icazə vermir.
MTK-nın inşa etdiyi binanın sakini Rəna İsmayılova məsələ ilə bağlı məhkəməyə müraciət edib.
İddiaçı bildirib ki, 2022-ci ildə “Malibo” MTK-nın Nəsimi rayonunda tikdiyi binadan 202 min 130 manata mənzil alıb. Lakin bir müddət əvvəl şirkət kommunal borcların ödənilmədiyini əsas gətirərək binanın lift sistemini idarə edən brelokları bloklayıb. Bu isə vətəndaşın mənzilinə çıxış hüququnu məhdudlaşdırıb.
Ərizədə qeyd olunub ki, liftlər binanın ümumi istifadədə olan texniki sahələrinə aiddir və onlardan istifadə hüququ bütün mənzil sahiblərinə aiddir. Əgər sakinlərin hər hansı biri borcludursa, MTK yalnız həmin şəxsə qarşı məhkəmədə iddia qaldıra bilər. Amma borca görə vətəndaşın mənzilinə çıxışını məhdudlaşdırmaq hüquqi baxımdan yolverilməzdir.
İddiaçı MTK-nın bank hesabına iddia məbləği qədər həbs qoyulmasını və brelokların bloklanmasının aradan qaldırılmasını tələb edib.
Nəsimi Rayon Məhkəməsi əvvəl ərizəni geri qaytarsa da, sonradan vətəndaşın hüququnu tanıyıb. Qərarda deyilir ki, vətəndaşla şirkət arasında mülki məhkəmə icraatı yekunlaşana kimi lift brelokları blokdan çıxarılmalıdır.
Maraqlıdır ki, şikayətçi vətəndaş R.İsmayılova sosial şəbəkə hesabında etdiyi paylaşımda “Malibo” MTK-nın hələ də məhkəmə qərarını icra etmədiyini bildirib.скачать dle 12.1