Ordumuzun həyata keçirdiyi son əməliyyatın nəticələri necə oldu?

Birincisi, hərbi nəticələrdir:

- 2054 metr yüksəklikdəki strateji bölgəyə (Quyruqyal adlanır) nəzarət bərpa edildi: Sarıbaba dağından 2.9 kilometr şimal-şərqdə yerləşən bu yüksəklik separatçıların tikinti işləri apardığı torpaq yolu - Xankəndi-Kosalar-Mirzələr-Turşsu - nəzarətdə saxlamağa imkan verir;

- Separatçıların intensiv şəkildə istifadə etdiyi Xankəndi-Xəlfəli-Turşsu yolu nəzarətə götürüldü;

- Xankəndidəki separatçıların Ermənistana çıxış kimi istifadə etdiyi bütün yolları bağlandı;

- Müharibədən sonra azsaylı ermənilərin qaldığı və sülhməramlıların nəzarət etdiyi bölgəyə daxil olan Böyük Qaladərəsi, Kiçik Qaladərəsi və Turşsu kimi kəndlərlə separatçıların arasındakı əlaqə kəsildi: bu, həmin ərazilərin də yaxın gələcəkdə ordumuzun tam nəzarətinə keçməsinə şərait yarada bilər;

- Separatçıların silah-sursat və canlı qüvvə toplamaq imkanları sıradan çıxarıldı;

İkincisi, siyasi nəticələrdir:

- Separatçıların alternativ yollarının bağlanması Bakının Xankəndi üzərində təsir imkanını artıracaq;

- Separatçıların Qarabağdakı erməni əhalisi üzərində təsirinin azalması ilə nəticələnəcək və bu, erməni əhalisi arasında inteqrasiyanın alternativi olmadığı rəyinin güclənməsinə şərait yaradacaq;

- Laçın yolunda olduğu kimi torpaq yollara da Bakının nəzarət etməsi qeyri-humanitar daşımaların qarşısının alınması ilə yanaşı, həm də lazım olanda bundan təsir rıçaqı olaraq da istifadə etmək imkanı verir;

- Və ən mühüm məqamlardan biri də odur ki, rəsmi Bakı bu addımlarla öz suveren ərazisində istədiyi kimi davranacağını və qeyri-qanuni fəaliyyətlərə imkan verməyəcəyini praktiki olaraq nümayiş etdirdi;

Baş verənlər deməyə əsas verir ki, artıq xəbərdarlıq yox, praktiki addımların atılması aktualdır.